Johannesburg – “Ons wil álles hê wat wit mense het, dít is waarvoor ons veg,” het ’n begeesterdeJulius Malema, ANC-jeugleier, aan die vooraand van die jeugliga se massa-optog vir ekonomiese bevryding gesê.

Hy het Sondagmiddag in die Bantu Bonke-township in die Vaaldriehoek gepraat as deel van ’n rits besoeke aan verskeie plekke in Gauteng om steun te werf vir die jeugliga se optog wat Donderdag in Johannesburg begin en Vrydag by die Uniegebou in Pretoria eindig.

“Ons veg nie meer vir die reg om te stem nie, ons veg nou om brood op die tafel te sit. As julle nié opdaag nie, sal julle vir altyd slawe bly van armoede,” het hy gesê.

Hy het sy dag Sondagoggend by die Ratanda-Metodiste-kerk in Heidelberg begin waar hy ’n kerkdiens bygewoon het en deur die kerkleiers die hande opgelê is.

Tydens sy spreekbeurt het hy aan die gemeente gesê ’n politieke party wat in konflik is met die kerk sal irrelevant word en uitsterf. Hy het die kerk gevra om vir die land se leiers te bid en gesê “die ANC sal altyd die kerkleiers respekteer, selfs al sê hulle hulle gaan teen die ANC bid”.

Sonder sy grys kerkpak en met sy Che Guevara-baret terug op sy kop, het hy in ’n stampvol gemeenskapsaal in Bantu Bonke mense aangepor om in opstand te kom en grond, myne, huise en werksgeleenthede te eis.

“Vryheid is betekenisloos as ons nie ons eie huise het nie. Geld praat. Solank ons nie geld het nie, sal ons altyd onderdanig bly.”

Hy het gesê die jeugliga gaan die ANC-leierskap en die regering vra om landbougrond aan “die mense” terug te gee.

“Die stryd is nog nie gewen nie, want die ware oorlog gaan oor grond. Die land se grond is in die hande van die minderheid, maar hulle het nie enige grond of minerale gebring nie, die land met alles daarin behoort aan ons!”

Solank swart mense nie ekonomiese mag het nie, sal hulle nooit uit armoede opstaan nie en altyd slawe bly, het hy gesê.

“Ons is nie meer tevrede met maatskaplike toelaes nie, ons soek grond. Ons wil ons eie base wees,” het hy onder luide toejuiging gesê.

Insp. Edna Mamonyane, metropolisiewoordvoerder van Johannesburg, het gesê toestemming vir die jeugliga se optog is die naweek toegestaan.

“Hulle mag ’n optog hou, maar nie op die hoofweë nie.”

Die ANC-jeugliga beplan maksimale ontwrigting en gaan die verkeer ontwrig deur nie agterpaaie nie, maar hoofweë te gebruik, het Malema Vrydag gesê.

“Ons het reeds met die jeugliga en ander belangegroepe vergader en sal môre ons operasionele plan begin finaliseer,” het Mamonyane gesê.

Mamonyane het gesê die metro­polisie en SAPD sal in groot getalle opdaag om die skare onder beheer te hou.

Die jeugliga het gesê hulle gaan busse en minibustaxi’s na townships oor die provinsie heen stuur om mense op te laai en na die optog te vervoer.

Skakel: http://afrikaans.news24.com/Suid-Afrika/Nuus/Ons-wil-alles-he-Malema-20111024